حذر الرحالة المصري أحمد مدحت حجاج ، المعروف باسم "حجاجوفيتش" من السفر لبلاد أوروبا الشرقية وهي (المجر – صربيا – رومانيا – سلوفاكيا) وخاصة المجر حسبما أكد حجاجوفيتش على صفحته الرسمية بموقع التواصل الاجتماعي فيس بوك .

وبرر سفير السلام العالمي "حجاجوفيتش" تحذيره بـ 10 أسباب:

1-البلاد دي إسمها "بلاد غجر أوروبا" يعني الأفقر و الأخطر و الأكتر إجراماً في كل القارة الأوروبية

٢- بيحصل بمعدل يومي مئات السرقات بالغاز المخدر شديد المفعول ملوش أي ريحة أو لون "يتم رشه عن طريق أنبوبة صغيرة من تحت الباب أو من أي فتحة" في القطارات و بيوت الشباب و الهوستل و بعض الفنادق، و بيتم سرقة كل حاجة معاكم ده لو حظكم حلو "الموضوع ده منتشر بطريقة رهيبة في بلاد أوروبا الشرقية" و لسة جديد علي بقية دول العالم

٣-لو حظكم وحِش حيتم سرقة أعضائكم البشرية أو أطفالكم و إنتم فاقدين الوعي تحت تأثير الغاز المخدر و في ٩٩٪ من الحالات عمركم ما حتشوفوا أطفالكم تاني لأنهم بياخدوهم يشحتوا بيهم في بلاد تانية زي ألمانيا و إيطاليا و عمركم ما حتعرفوا مين سرق أعضائكم البشرية

٤-الشرطة في البلاد دي "شدييييدة الفساد" و كل اللي حيعملوه ليكم لو رحتم قسم الشرطة عشان تعملوا بلاغ إنهم حيكتبولكم محضر و بعدين حيقوللكم بما معناه "بلوه و إشربوا مايته"

٥-في بعض الحالات الناس اللي بتتسرق منها كمبيوترات أو كاميرات أو حتي عربيات، بعد يومين تلاتة بيلاقوا حاجاتهم معمولها إعلانات للبيع علي الإنترنت و لو "إنت لسة في البلد أصلاً" و رحت للشرطة، مش حيعملولك أي حاجة و حيقولولك روح إشتريها منهم !!

٦-البلاد دي الناس فيها عنصريين جدااااااااا لدرجة لا يمكن وصفها ضد العرب "مسلمين و مسيحيين" ، أي حد شكله عربي حتي لو مكانش عربي من الاساس

٧-أي حد مصري أو عربي حييجي الدول دي حيحس بالعنصرية الشديدة في كل مكان "كل الناس حتعاملك بإحتقار و إستفزاز شديد" زي ما الألمان كانوا بيعاملوا اليهود في بداية أيام هتلر ، لدرجة إنك أول ما حتدخل سوبرماركت أو محل عشان تشتري حاجة حتلاقي فرد أو فردين أمن ماشيين وراك زي ضلك "كأنك حرامي محترف" و بعدين حيفتشوك لما تشتري الحاجة !!

٨-لو لا قدر الله نويت تركب مترو أو ترام أو أوتوبيس أو قطار ده يبقي من حظك التعيس لأن السواق حيبلغ الأمن أو الشرطة و حتلاقيهم طالعين "الحاجة اللي إنت راكبها" و سايبين الناس كلها و جايينلك إنت و بيسألوك علي التذكرة و الباسبور بتاعك و حتي لو معاك، حينزلوك من المواصلات و حيبلطجوا عليك شوية و حيكون نفسهم إنك تتخانق معاهم عشان يخدوك علي القسم و يعملوا عليك حفلة "

٩-لو إنتي محجبة "بلااااش أبداً" تيجي البلاد دي حتي و الله لو ببلاش الرحلة ، عشان إنتي حتكوني بجد عملتي غلطة عمرك و كل الناس في الشارع و حتي في الأماكن السياحية حتهاجمك و تقولك كلام مهين "كتير منكم لو فهمت معناه حتعيط كتير أوي" و لسة الموضوع ده حصل قدام حجاجوفيتش في مترو الأنفاق في بودابست، شوية عيال شباب من المجر إتلموا علي شابة مسلمة شكلها زي الملاك "من ألمانيا" لابسة الحجاب و مردوش ينزلوها من المترو إلا لما تقلع الحجاب و لما رفضت ، إبتدوا يبلطجوا عليها و يحاولوا يقلعوهولها بالقوة لغاية ما‫#‏حجاجوفيتش و شابة تانية من أمريكا في المترو راحوا يدافعوا عنها و يسحبوها من البلطجية...
و الموضوع ده بيحصل بصفة يومية في القطارات في سلوفاكيا و رومانيا و المجر و صربيا و ساعات التشيك

١٠-أي حد حيضطر لأي سبب إنه يبدل فلوس بلاش تماماً إنك تبدلت من الصرافات "لأنهم في معظم الوقت حيدوك فلوس مضروبة" و دايماً روح بدلها من البنك، و لو حتستخدم كارت البنك بتاعك لسحب فلوس من ماكينة السحب خلي بالك إنهم دايماً بيكونوا حاطين قطعة بلاستيك إليكترونية صغيرة جداااا في فتحة الكارت عشان تقرا المعلومات بتاعة كارتك و عليه العوض و منه العوض في فلوسك اللي في الحساب لأنهم حيسرقوها كلها .

حجاجوفيتش هو رحالة مصري ومغامر وخبير سياحي عالمى اشتهر بإبن بطوطة القرن الـ 21 والسفير غير العادى لمصر وسفير السلام العالمي، مهمته هي أن يكون أول إنسان في التاريخ يسافر إلى كل دول العالم بغرض نشر قيم السلام والمحبة ومحاربة العنصرية وتصحيح الأفكار الخاطئة عن دول العالم رافعا علمه المصري في جميع تلك الدول.